إحدى روائع الشاعر المبدع / رمضان العلالقة . : بعنوان ( خارج حدود الزمن )
خارج حدودك يا زمن
بفكر في وضعك و المحن
الفكرة تيجي و ترجع تغيب
و أحاول بأيدي ألمها
تروح و ترجع لوحدها
و أزرع ورد ف أرض السكات
كلمة محبة و ذكريات
و قلت ارسم أجمل شجر
قاعد لوحدى و افـــــــــــتكر
أجيب الخطوط على بعضها
و افكر في دنيا وهمها
ارسم لوحة و اللون يطير
و ارجع اسأل في شأنها
يا دنيا ليه وضعك خطير
تمشي بينا و ترجعينا
لا فيه صغير و لا فيه كبير
و الغني ليه يخدع فقير ؟
و نرسم ورد لشجر الخريف
نرسم بخط و لون ضعيف
و نقول دي لوحة مظبطة
و هي خطوطها ملخبطة
لا سوريا عارفة بالذوء تعيش
في ليبيا قالوا خلاص ما ليش
لبنان جمالها خلوه في حالها
و بلاش بومة تسكن جبالها
تونس لبسوها لبس العريس
الوضع سيء و كمان تعيس
و في الجزائر دابت الدفاتر
اللون بيبهت و لسة فاكر
ماعادش لون عند العراق
اللون بيكدب دا لون نفاق
قلت اجيب ألوان جديد
و ارسم خريطة اليمن السعيد
و تروح هناك و أنا أروح هنا
و نشد الخريطة بين بعضنا
نعمل علامة و لسة ياما
نرسم خريطة لوحدنا
نرسم صومال و جبال محال
اللون بيبهت و نقول جمال
القدس قالوا هيحرروها
و قالوا السودان هيريحوها
و لفلفوها و قسموها
فكرت في حجات
و حجات كتير
قطر الأميرة بنت الأمير
معاها ياما فلوس كتير
دخلوها كلية جراحة
و علموها تقول الصراحة
لسان عربي مليان فصاحة
أدوها إبرة و خدروها
قالوا هتنسي و لاد أبوها
يبقى قوللي فين القضية ؟
ولا لعب و رش مية
بلاش معاكسة و بلاش رزية
هو فيه قضية بشتات ؟؟
المطلوب منا السكات
و نروح خارج حدود الزمن
و نسيب بلادنا و يموت ولادنا
و كل شيء من غير تمن
عاملين قضية معقدة ؟
و الدنيا رايحة ف أيد العدا
لا تقول نصاري و لا مسلمين
ما نكونش مرة مشتتين
مرة سنة و مرة شيعة
حاجات بتحصل حاجة فظيعة
وضع متعب وشيء مخيف
نسينا طريق الرسول الشريف
الطريق واضح و له دليل
ولا حتى مرة شفنا له ميل
و ندور في دايرة مفرغة
مطلوب ننسي حتى اللغة
بكلمة باردة ملمعة
عشان نسكت ما فيش كلام
نحلم و نصحي و قوام ننام
اللوحة بهتت و ألوانها دابت
ماسكها ف أيدي و أيدي سابت
مصر الحبيبة قالت خلاص
بعنيها يومها قرت المقاس
قالت تعبنا كلام مناهدة
و مهما الدنيا تكون معاندة
كل شيء و له تمن
و هنبقي جوه حدود الزمن
^^^^^^^^^^^^^^^^
بقلم / رمضان العلالقة
شاركت و فازت بمسابقة
القلم الحر الدولية
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.