( ليل باهت ) قصيدة عامية مصرية : بقلم الشاعر المبدع/ على أحمد
_________________________
ف ليل باهت
بسبب الحزن والكسرة
ف أيده فنجان من القهوة
واوضة وبيت من اﻻحزان
وحبة روح
ودمعة تتوه من السكة
وتمشى ف سكة المجروح
وذكرى تملى م اﻻحزان
وليل يحضن جراح مدبوح
برغم سكوته وثباته
دموعه بتحكى مية قصة
ومية كسرة بصوت مدبوح
دموع مش ليها أيّها صوت
لكن قلب بيصرخ موت
ف حلم اتهد كان عايز
يوصل ليها حضن الروح
قاعد ف وسط زحمة ليل
ونفسه بايده يحضنها
وتيجى كمان عينيها ف عينيه
طريق باعد ومش بايديه
دموع بتهد جوا عينيه
وطيف لحبيبته ف اﻻوضة
كتاب وعليه ميت كلمة
وأولهم اسيبك ليه
وعود كدابة تتجدد
وعايشة تملى تجرح فيه
واهو صاحبنا كمان قاعد
ف نص الليل قاعد يدعى
يارب احمينى م اللى انا فيه
وردنى ليك اوى يا ربى
واملى فيك متكسرنيش
دموعى بتروى مليون خد
وتحضن جوف كله عليل
يا رب ارحم عيون دبلت
ف نص الليل
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.