( صعب أوصفك ) بقلم / شاعر بلا قلم
لو سألوني ف مرة عنك
صعب جدا أوصفك
و ان حاولت اكتب قصيدة
خايف ماقدرش انصفك
أصلك انتى
مش مجرد حد عادي
مهما كنتى ..
قلبي حاسس بيكى قصادي
إنتى تشبهى للنسيم ..
لما يضحك للورود
زي قرص الشمس لما ..
يختفي وسط الغروب
إبتسامتك ..
تِشرِح القلب الحزين
نظرتك ..
خلّت الأحجار تلين
و ف ملامحك ..
فيه براءة ..
و فيه جراءة
فيها حتة من البشر
بس من جواك ملاك
لما تضحكِ ..
كل نجمة فِ السما
بتضحك معاكِ
و اما تهمسى ..
يتكسف كروان يغني
لما يسمع صوت غناكى
أوصف ايه ولاّ إيه ولاّ إيه
إنت حد جميل بجد
إنتى ما بتشبهشى حد
إنتى وردة جميلة بلدي
طالعة ف غير أوان الورد
إنت مش انثى و بس ..
لأ .. دانتِ سِت الناس
إنتِ جواكى شئ يتحس
ما انت منبع للإحساس
حبي ليكى عندى غالي ..
أغلى من الدهب و الماس
تاج و بينوّر جبيني ..
عمري كله فوق الراس
تستاهلى إنك تكونى حبيبتى
تستاهلى إنى أديكى قلبي
و عمري كله شوية عليكِ
عمري كله شوية عليكِ !
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.