__________________
ما تيجي بينا نتكلم عن الأيام
و عامل إيه ؟
بجد تمام
و كام إحساس يوشوشلك
و عاجز توصفه .. بكلام
و عن كام ذكرى مرمية
فى حضن الماضي متسابة
و عادة تقول هبطّلها
و تلقى الرغبة غلّابة
و عن أصحاب كتير حواليك
و صاحب بس ترتاح له
و ناس تمنعها تدخل فيك
و واحد بس تسمح له
و عن بنت الجيران لمّا
تفوت بعنيها قدامك
يرُوح القلب و يعلّق
في طَرْف رموشها أحلامك
و عن جوابات فى إعدادي
تحب تملّي تقراها
وبنت تقيلة فى الجامعة
حفيت ورا غيرها .. و وراها
و برضو لسّه موصلتش !
و عنك لما تعمل شاي
و يبرد و إنت مشربتش
و قلبك لما يمسك ناي
و يعزف كل حزن ماليك
و عن لستة أغانى " منير "
و صوته بيبتدى بـ "شبابيك"
و عن جيب الجاكيت لمّا
يدفي إيديك في عز البرد
و عن كشكول قديم جداً
مخبّي فـ قلبه صورة و ورد
و عن وقتك
و عن يومك
و بارفان ريحته في هدومك
و عقرب ساعتك الداير
بيلْدَغ فيك و في همومك
و عقلك في الظنون حاير
و عمرك لسّه أديه ماشي
و عن كام حاجة من غيرها
حياتك دي .. ماتحلاشي
د\على
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.