الشاعر المبدع / مصطفى ابو عمر .......فى قصيدة بعنوان ((الحلم ))

الحلم
الحلم خاف من الوجع
والظلم بهدل فى الجدع

وشوفنا فيه كل البدع
الحلم جاب خرزه وودع
علقهم عل باب واتخلع
متراسه كان ضاع وانقطع
والحبل كان دايب خسع
والحلم خاف لما اتسرع
ونادى وزعق لما دمع
خوفه من نار الحروب
وتقله من تقل الذنوب
وخايف علينا من العيوب
من همنا وكتر الكروب
خايف على بيت اتهدم
خايف على شاب اتظلم
خايف علينا من الندم
على دم سال من غير سبب
على اللى شال وزر وعتب
الحلم خاف والخوف عجب
والكلمة آه عدل اتحجب
ومسير ميزانه يتنصب
ومهما طال ظلم وغلب
الظلم ساعته بتتصلب
والعدل سيف يقطع رقب